حمله مسلحانه از خاک افغانستان؛ سه شهروند چینی در ختلان تاجیکستان کشته شدند

وزارت خارجه تاجیکستان اعلام کرد که شب گذشته مهاجمان مسلح از خاک افغانستان بر مقر یک شرکت چینی در ولایت ختلان حمله کردند و ۳ شهروند چین را کشته و چند نفر دیگر را زخمی کردند.

به گزارش خبرگزاری استقامت، به گفته دوشنبه، حمله با سلاح سبک و یک پهپاد مجهز به نارنجک بر شرکت خصوصی «شاهین» صورت گرفته است.

وزارت خارجه تاجیکستان امروز پنجشنبه، ۶ قوس/آذر این رویداد را شدیداً محکوم کرده و از طالبان خواسته فوراً برای تأمین امنیت مرزها اقدام مؤثر کند.

تاجیکستان مدعی است گروه‌های «جنایت‌کار» مستقر در افغانستان همچنان امنیت مرزی را مختل می‌کنند.

تاکنون هیچ گروهی مسئولیت حمله را بر عهده نگرفته و طالبان نیز واکنشی نشان نداده‌اند.

این حمله در حالی رخ داده که اخیراً رفت‌وآمد مقام‌های طالبان و تاجیکستان افزایش یافته و دو طرف بر بهبود روابط تأکید کرده بودند.